-शान्ता सापकोटा, गोरखा,आरुघाट, मार्च ८, २०२०
कसले चलायो यो चलन ?
कसको हो यो बलिदान ?
कोही कसैलाई चासो छैन !
सामाजिक सन्जालमा
रातै पहेंलै सजिएका
ती नारीहरू देखिन्छन्
जसलाई हरेक दिन
प्रत्येक बार
नारी दिवस छ !
खोलाका तीरमा
चर्को घाममा पिल्सिएर
ढुंगा र बालुवासित जुध्दै
गाॅंस जुटाउन तल्लीन
हल्केलाभरि ठेला बोकेर
पसिनाले नुहाइरहेका नारीहरूलाई सोध
के हो नारी दिवस ?
अनकन्टार भिरमा
डोको र नाम्लो बोकिरहेका
कुर्कुच्चा फाटेका
खाली पैतालाका नारीहरूलाई सोध
के हो नारी दिवस ?
दिनभरि मजदुरी गरेर
खुइय ..गर्दै
थकाइ मेटाउन
झुपडीमा छिर्न नपाउॅंदै
नशाले लठ्ठ
उन्मत्त आफ्नै मान्छेबाट
जगल्टा उखेलिॅंदै
लात खान विवश
ती नारीहरूलाई सोध
कहाॅं छ नारी दिवस ?
कस्मेटिकले वास्तविकता लुकाउन सक्ने
हे महिला दिवसका दिदीबहिनीहरू !
सडक किनारामा
झरी र घाम पचाएर
मकै पोल्दै
मकै भुट्दै
धुलो र धुवाॅंभित्र हराइरहेका
ती महिलाहरूलाई सोध
के हो श्रमिक महिला दिवस ?
अशिक्षाले अनाथ र अबोध बन्दै
जन्मभूमिको सिमाना कटाइएकी
जिउनुको वास्तविक अर्थ नै
शब्दकोशबाट हटाइएकी
पुरुषकै लागि सजाइएकी
नारीलाई सोध
के हो नारी दिवस ?
आधाभन्दा बढी महिलामा
यही तीतो यथार्थ हुॅंदा हुॅंदै
मात्र एक दिन !
त्यो पनि
पुरुषले नै लगाइदिएको भागबन्डामा
आफ्नो दिवस सम्झिएर
दिदीबहिनीहरू !
व्यर्थै किन नाचिरहेका छौ ?
सन्जालको भित्ताभन्दा पर
अर्को कस्तो जीवन छ ?
थाहा छैन ?
क्लारा जेटकिनको
विचार र हिम्मत के ठट्टा हो ?
साहस छ भने
सन्जालभन्दा पर
दिदीबहिनीहरू हो !
आओ मनाऔॅं
वास्तविक नारी दिवस
दूर दूरका बगरहरूमा !!
**शान्ता सापकोटा खनालका कविता**
सिफारिस
रूपान्तरण!
हारेको कांग्रेसको रुन्चे ढिपीका कारण गृहमन्त्रीले पेश गर्ने बिधेयक सुच...
एमाले नेता तथा गुण्डा बस्नेत विरुद्ध बलात्कार गरी गर्भपतन गराएको जाहे...
एनआरएनए:अदालतको फैसला, मताधिकार भएका-नभएका नेपाली र केहि अन्योलता