.png)
-तीर्थराज अधिकारी,गोरखा, लप्सीबोट; हाल:सरस्वतीनगर, काठमाडौँ-६, जुन २०, २०२०
१
भन्छन् हिमालले उच्चा शिर कैल्यै नलत्रनू
भन्छन् गुराँसले कैल्यै रङ्ग रातो नमैलिनू
छहरा पहरा झेल्दै नाच भन्छन् निरन्तर
नदी भन्छन् नलम्केर कहाँ भेटिन्छ सागर ?
२
गला खोलेर गुन्जाऊ गीत भन्छन् चराहरू
शीतताप पचाएर फुल भन्छन् जराहरू
भन्छन् जून सयौँ तारा बल्नै पर्दछ रातमा
जाग्नै पर्छ सधैँ जाग रवि भन्छन् प्रभातमा ।
३
ताल भन्छन् यतै हेर मुहार किन दर्पण ?
गुफा भन्छन् तपस्यामै गर जीवन अर्पण
रोगव्याधि निको पार्छौँ भन्छन् सारा वनस्पति
भन्छन् ढुक्कुरका जोडी हेर यो दिल सम्पति !
४
वरपीपलले भन्छन् गाल्नै पर्दछ पत्थर
सुनगाभा यसै भन्छन् रोक्न के सक्छ अक्कर ?
खुला आकाशले भन्छ छोप्न के सक्छ बादल ?
विशाल धरती भन्छ फुलाऊ दिलले दिल ।
५
फैलाए प्वाँख को छेक्छ ? उँड भन्छन् चराहरू
पसिनामै सबै रङ्ग खोज भन्छन् गराहरू
डाँफे - मयूरले भन्छन् छ र अन्त कतै कला ?
इन्द्रधनुषले भन्छ हेर यो रूपको तला !
६
आफ्नै जे जति हो ज्योति फैलाऊ भन्छ जुन्किरी
लोक लाखौँ गला खोल्दै रमाऊ भन्छ बाँसुरी
आऊ माया यतै गाँसौँ भन्दछन् वन- कन्दरा
आऊ माथि सँगै हासौँ भन्दछन् गिरि- टाकुरा ।
७
बुकी भन्छ कहाँ होला लेक झैँ अन्त सुन्दर
धुपी भन्छ यही लेक लाग्छ नित्य मनोहर
भिरै प्यारो भनी मौरी भिरमै गुन्गुनाउँछन्
काँडा टेकी फुलौँ भन्दै फूल सन्देश ल्याउँछन् ।
८
जाल बुन्ने भए केही सिक क्यै भन्छ माकुरी
रोक्दै विवेकले भन्छ नखेल खेल आसुरी
आहा ! जीवन भन्दैछन् बोटका नवमञ्जरी
पुराना पात भन्दै छन् हाम्रा छन् साथमा हुरी ।
९
ती कर्मी कमिला भन्छन् गरौँ काम सबै मिली
रङ्गिला पुतली भन्छन् थपौँ क्यै फूलमै चुली
कस्तूरी मृगले भन्छ मीठो सुगन्ध हो कता ?
रजहाँसहरू भन्छन् नदौड भ्रममा उता ।
१०
गौँथली गुँडका चुच्चा , मौरीका महका रस
भन्छन् सत्कर्ममा लाग नपाल भित्र आलस
नबोलेर झनै बोल्छन् वनका लतिका तरु
पाठशाला कता खोजौँ यतै छन् गुरुका गुरु ।
**तीर्थराज अधिकारीका अरु कविता**
सिफारिस
एनआरएनएमा कुन बाटो होइन मुक्त राजनीतिको मूल बाटो
हेड्स नेपालद्वारा मानसिक स्वास्थ्यको क्षेत्रमा काम गर्ने हेड्सको प्रति...
रूपान्तरण!
हारेको कांग्रेसको रुन्चे ढिपीका कारण गृहमन्त्रीले पेश गर्ने बिधेयक सुच...