तीर्थराज अधिकारी
१)
छानो भव्य हिमालको छ सुकिलो छन् टल्कने चाॅंदनी
पोत्छन् हर्दम स्वच्छ धार जलले छाॅंगा परी मोहिनी
आभा दिव्य कहाॅं छ तुल्य भवमा स्रष्टा कला शिल्पको
यात्री अन्तरचेतका चरणमा प्यारो छ नेपाल यो ।
२)
नानी तुल्य छ रूपमा मृदुल यो मोती छ यो मोलमा
तारा तुल्य छ ज्योतिमा कुसुमको हो बाग भूगोलमा
बाढी मत्त उठी कुनै लहरले तानेर तानिन्न यो
आस्थाको छ विशाल भाव जगमा प्यारो छ नेपाल यो।
३)
डाॅंफे रंग तरंग ताल कति छन् , छन् गीतका किन्नरी
ल्याई घाम सजाउने हृदयमा छन् दूधका पोखरी
चोखो मूल अनन्त कल्कल कला सुक्दैन , लुक्दैन यो
यात्री सागर ज्वारको , लहरको प्यारो छ नेपाल यो।
४)
हिंसा , मार र काटका छल यहाॅं आफैं गली ढल्दछन्
सच्चा देव दया यतै मनुजका छाती खुली बल्दछन्
होला रात प्रभात काल नहुॅंदा अन्योल क्यै त्रासको
न्यानो घाम उदाउॅंदा जगतकै प्यारो छ नेपाल यो ।
५)
भो ! भो ! हेर्न कदापि सक्दिनॅं कतै संग्राम यो ग्रामको
भो ! भो ! सुन्न कदापि सक्दिनॅं कतै दुर्नाम यो धामको
उम्लेका मनका कुनै जहरले डामेर झर्दैन यो
यै लाखौॅं बुटीको अपार थल हो प्यारो छ नेपाल यो ।
६)
आंखा, नाक, गला, कला फरक छन् - राम्रो भयो सृष्टि यो
पेसा , भेष , छटा , थला फरक छन् - शृंगारले चम्किलो
नेपाली थर - जात हो सकलको सम्मान सद्- भावको
गुम्बा ,मस्जिद भेद छैन मठमा प्यारो छ नेपाल यो ।
७)
होलान् बास सुदूर पूर्वतिर क्वै , होलान् कुनै उत्तर
होलान् पश्चिममा र दक्षिण कुनै , हो मृत्तिका यै भर
मिल्दा आपसमा कला सकलका नौलो छ यो रूपको
माली हात चलाउने जतनमा प्यारो छ नेपाल यो ।
८)
त्यागी पूर्वजका अदम्य बलका सत्कर्मका पाखुरा
जस्तै बन्न सके उदार मनका फुल्छन् यिनै टाकुरा
तापै- ताप फलाउने असुरको माटो कुनै हैन यो
ज्ञानी ज्ञान सजाउने रहरमा प्यारो छ नेपाल यो ।
९)
जन्मे जीवन ज्योतिमा प्रबल भै सत्काव्यका साधक
जन्मे वीर यतै यसै प्रकृतिमा जन्मे महानायक
माटो रंग फुलाउने हृदयमा साॅंच्चैं कलाकार हो
उच्चा उर्वर प्राणका नजरमा प्यारो छ नेपाल यो ।
१०)
प्यारा सन्तति दूरका रहर क्यै मेट्दै फिरून् द्वारमा
बत्ती स्वागतका निमित्त उनकै बल्नेछ संघारमा
चोथो हैन यहाॅं कथा कहरको खाॅंचो छ उत्सर्गको
लाग्ने सिर्जन मार्गमा अकलको प्यारो छ नेपाल यो ।
***गोरखा, लप्सीबोट. हाल-सरस्वतीनगर, काठमाडौॅं - ६***
सिफारिस
व्यासका अध्येता न्यौपानेको अशून्यम् लोकार्पण
झापाको बिर्तामोडमा चैत्र १२ गते टुबोर्ग होलि हङ्गामा हुने
बागलुङ सेवा समाज र बलेवा समाज अमेरिकाको संयुक्त आयोजना, न्यूयोर्कमा चै...
कम्युनिष्टको आदेशले फसेका गृहमन्त्री लामिछाने संचार क्षेत्रको बिरोधले...