-तीर्थराज अधिकारी, गोरखा लप्सीबोट, हाल:सरस्वतीनगर, काठमाडौॅं-६//२७/२०
विवाहको अलमलले
केटी माग्न नबिर्सिएको भए
केटालाई दुलहा बन्न हतार छ
केटीले केटा रोज्न
नबिर्सिएको भए
उनलाई दुलही बन्न हतार छ
कसलाई , कहाॅं फुर्सद छ र ?
जन्त जान हतार छ
गहना र पोसाक देख्न हतार छ
देखाउन हतार छ
भोज खुवाउन हतार छ
खान हतार छ
उपहार दिन हतार छ
लिन हतार छ !
साइतै साइतले भरिएको
सारपूर्ण यस मासलाई
बुझ्दै नबुझी
असार भन्ने को होलान् ?
कतै कसैलाई
घुम ओढ्दै
मुठी रोपेर
मुरी उब्जाउने हतार छ
मेला जान र फर्कन हतार छ
कतै कसैलाई
जुममा जम्दै
कुरा रोपेर कुरा फलाउन हतार छ
भेलामा भेट हुन हतार छ
भेलाबाट छुट्टिन हतार छ !
मूललाई फुट्न हतार छ
खोलालाई जुट्न हतार छ
कुहिरालाई दौडिन हतार छ
पातलाई पौडिन हतार छ
इन्द्रेणीलाई फुल्न हतार छ
हलीलाई गोरु चुट्न हतार छ
बाढीलाई बस्तीमा डुल्न हतार छ !
सत्ताका शासकहरूलाई
गमलाका बिउ गमलामै रोप्न हतार छ
किन चाहिन्छ र मल ?
किन चाहिन्छ र स्थल ?
आफ्ना कृषिप्रेमी तस्बिरहरूले
संजाल ढाक्न हतार छ !
बजेट- लिनेलाई लिन हतार छ
ठेकेदारहरूमा एकाएक जाॅंगर पलाएर
देशमा विकासको लहर ल्याउन !
रोकिएका तमाम काम
दिनरात केही नभनी सक्ने हतार छ
बिल-भौचर बनाउने हतार छ
कान र मुख मिलाउॅंदै
साउती मार्न हतार छ !
रविलाई घुम्टो ओढ्न हतार छ
कविहरूलाई
बाजेकविका गुणगान गाउन हतार छ
घाॅंसीले घाॅंस काटिसकेको
नारदजी सत्यलोक पुगिसकेको
खुसीको खबर !
गाउॅं-सहर सबैतिर सुनाउन हतार छ
बाजेका सालिक र तस्बिरहरूमा
फूलमाला चढाउॅंदै
कर्मकाण्डका विधि पुऱ्याएर
श्राद्धको प्रसाद खान हतार छ !
फुर्सद होला र कसलाई ?
कोही कसार बाट्दै होलान् !
कोही बेसार बेच्दै होलान् !
सबैलाई हतारै हतार छ
सारै सारको यस असारमा !!
सिफारिस
एनआरएनएमा कुन बाटो होइन मुक्त राजनीतिको मूल बाटो
हेड्स नेपालद्वारा मानसिक स्वास्थ्यको क्षेत्रमा काम गर्ने हेड्सको प्रति...
रूपान्तरण!
हारेको कांग्रेसको रुन्चे ढिपीका कारण गृहमन्त्रीले पेश गर्ने बिधेयक सुच...